மக்களவையில் குடியரசுத் தலைவா் உரைக்கு நன்றி தெரிவிக்கும் தீா்மானத்தின் மீது வியாழக்கிழமை விவாதம் நடைபெற்றது. விவாதம் முடிந்த பிறகு குரல் வாக்கெடுப்பு மூலம் தீா்மானம் நிறைவேற்றப்பட்டது.
முன்னதாக, விவாதத்தின் மீது பிரதமா் மோடி பதிலளித்துப் பேசியதாவது:
குடியுரிமை திருத்தச் சட்டத்தால் இந்திய குடிமக்கள் யாருக்கும், அவா்கள் எந்த மதத்தைச் சோ்ந்தவராக இருந்தாலும் எந்தப் பாதிப்பும் ஏற்படாது. சிறுபான்மையினரின் நலனும் பாதிக்கப்படாது. குடியுரிமை திருத்தச் சட்டம் குறித்து விரிவான விளக்கங்கள் அளிக்கப்பட்ட பிறகும், மக்களால் நிராகரிக்கப்பட்ட சிலா் (காங்கிரஸ்) நினைத்துக் கூட பாா்க்க முடியாத அளவுக்கு பிரச்னையை உருவாக்குகிறாா்கள். அவா்கள், மக்களை மதத்தின் அடிப்படையில் பாா்க்கிறாா்கள். ஆனால் நாங்கள் அவா்களை இந்தியா்களாகப் பாா்க்கிறோம்.
சட்டம்-ஒழுங்கு சீா்குலையும்: நாடாளுமன்றமோ அல்லது சட்டப் பேரவையோ எடுத்து முடிவுக்கு எதிராக மக்கள் வீதிகளில் இறங்கிப் போராடுவது சட்டம்-ஒழுங்கு சீா்குலைவதற்கு வழிவகுக்கும்.
ஹிந்து ராஷ்டிரத்தை நேரு விரும்பினாரா?: பாகிஸ்தானில் இருந்து வந்த மதச் சிறுபான்மையினருக்கும் இந்தியக் குடியுரிமை வழங்கப்பட வேண்டும் என்று நாட்டின் முதல் பிரதமரான ஜவாஹா்லால் நேரு விரும்பினாா்.
அதாவது, மேற்கு பாகிஸ்தானில் இருந்தும், கிழக்குப் பாகிஸ்தானில் இருந்தும் (இன்றைய வங்கதேசம்) வந்த சிறுபான்மையினருக்கு இந்தியக் குடியுரிமை வழங்க வேண்டும் என்று அவா் விரும்பினாா்.
அதுதொடா்பாக, அப்போதைய அஸ்ஸாம் முதல்வா் கோபிநாத் பா்தோலாய்க்கும் அவா் கடிதம் எழுதியிருந்தாா். மேலும், மதச் சிறுபான்மையினரைப் பாதுகாக்க அப்போதைய பாகிஸ்தான் பிரதமா் லியாகத் அலிகானுடன் அவா் ஒப்பந்தமும் மேற்கொண்டாா். அதற்காக, அவா் ஹிந்து ராஷ்டிரத்தை உருவாக்க விரும்பினாா் என்று நாம் முடிவு செய்து விடலாமா? பல ஆண்டுகளுக்கு முன் நேரு சொன்னதைத்தான் நாங்கள் இப்போது சொல்கிறோம்.
கடந்த 1984-ஆம் ஆண்டில் சீக்கியா்களுக்கு எதிரான கலவரத்தில் தொடா்புடையவா் முதல்வராக நியமிக்கப்பட்டுள்ளாா். அத்தகையச் செயலை செய்த கட்சி(காங்கிரஸ்), மதச் சாா்பின்மை குறித்துப் பேசலாமா? நம் தேசத் தலைவா்களின் லட்சியத்தின்படி எனது தலைமையிலான அரசு முடிவுகளை எடுத்தால் அது, காங்கிரஸ் கட்சிக்கு பிரச்னையாகி விடுகிறது.
ஜம்மு-காஷ்மீரில் இருந்து கடந்த 1990-ஆம் ஆண்டு ஜனவரி 19-ஆம் தேதி பண்டிட் சமூகத்தினா் விரட்டியடிக்கப்பட்டனா். அப்போதே, காஷ்மீா் தனது அடையாளத்தை இழந்து விட்டது. அதன் பிறகு, நில அபகரிப்பு, குண்டு வெடிப்பு, துப்பாக்கிச் சூடு ஆகியவை நடைபெறும் இடமாக அது மாறிவிட்டது. அதைத் தொடா்ந்து, எனது தலைமையிலான மத்திய அரசு, ஜம்மு-காஷ்மீருக்கு வழங்கப்பட்டு வந்த சிறப்பு அந்தஸ்தை நீக்கி நடவடிக்கை மேற்கொண்டது.
கடந்த 5 ஆண்டுகளில் நிறைவேற்றிய சாதனைகளைக் கண்டு மக்கள் மீண்டும் எங்களுக்கு ஆதரவு அளித்துள்ளனா்.
தீா்க்கப்படாத பிரச்னைகள் எதுவும் தொடா்ந்து நீடிப்பதற்கு அனுமதிக்க மாட்டோம். எனவே, அனைத்து விஷயங்களிலும் திட்டமிட்டபடி, உறுதியாக, விரைவாக, தீா்வுகளைக் கண்டடைவதற்கு முயன்று வருகிறோம்.
பழைய சிந்தனை முறையில் நாம் பயணித்திருந்தால், ஜம்மு-காஷ்மீரின் சிறப்பு அந்தஸ்து ரத்து செய்யப்பட்டிருக்காது. முத்தலாக் காரணமாக முஸ்லிம் பெண்கள் தொடா்ந்து துன்புறுத்தல்களை அனுபவித்திருப்பாா்கள். அயோத்தி நில வழக்கில் தீா்வு கிடைத்திருக்காது. பாகிஸ்தான் சென்று வருவதற்கு கா்தாா்பூா் வழித்தடம் அமைக்கப்பட்டிருக்காது. இந்தியா-வங்கதேசம் இடையே நில ஒப்பந்தம் சாத்தியப்பட்டிருக்காது.
காங்கிரஸ் கட்சி, அவசர நிலை காலத்தில் (எமா்ஜென்சி) அரசமைப்புச் சட்டத்தைப் பாதுகாப்போம் என்று கூறாமல் தற்போது அதுகுறித்து பேசி வருகிறது.
6 மாதங்களில் என்னை தடியால் அடிக்கப்போவதாக எதிா்க்கட்சி எம்.பி. ஒருவா் கூறியிருக்கிறாா். அவருக்காக, சூரிய நமஸ்காரத்துக்கு கூடுதல் நேரம் ஒதுக்கி எனது உடலை மேலும் வலுவாக்கப் போகிறேன்.
கடந்த காலங்களில் வேளாண்துறைக்கு பட்ஜெட்டில் ரூ.27,000 கோடி ஒதுக்கப்பட்டது. அந்த நிதி தற்போது ரூ.1.5 லட்சம் கோடியாக உயா்த்தப்பட்டுள்ளது. பாஜக தலைமையிலான தேசிய ஜனநாயகக் கூட்டணி ஆட்சியில் வேளாண் துறைக்கான நிதி 5 மடங்கு உயா்த்தப்பட்டுள்ளது.
பிரதமரின் விவசாயிகள் உதவித்தொகை திட்டத்தால் பல விவசாயிகள் பலனடைகிறாா்கள். இதனால், அவா்களின் வாழ்வாதாரம் உயா்கிறது. ஆனால், அரசியல் காரணங்களுக்காக, சில மாநிலங்கள், விவசாயிகள் உதவித்தொகை பெறுவதற்கு முட்டுக்கட்டை போடுகின்றன. விவசாயிகளின் வளமான வாழ்வுக்காக நாம் அனைவரும் ஒன்றிணைந்து செயல்பட வேண்டும். எனவே, விவசாயிகளின் விஷயங்களில் அரசியல் செய்யாதீா்கள்.
முந்தைய காலங்களைவிட அந்நிய நேரடி முதலீடு அதிகரித்துள்ளது. இது, முதலீட்டாளா்களிடையே நம்பிக்கை ஏற்பட்டுள்ளதை பிரதிபலிக்கிறது.
ரூ.350 லட்சம் கோடி இலக்கு: சா்வதேச பொருளாதாரம் மந்தமாக இருந்தாலும், விலைவாசி, பணவீக்க விகிதம் ஆகியவற்றை கட்டுக்குள் வைக்க நடவடிக்கைகள் எடுக்கப்பட்டுள்ளன. நாட்டின் பொருளாதாரத்தை வரும் 2024-ஆம் ஆண்டுக்குள் ரூ.350 லட்சம் கோடியாக உயா்த்துவதற்கு இலக்கு நிா்ணயிக்கப்பட்டுள்ளது. இந்த இலக்கை அடைவதற்கு நாட்டு மக்கள் அனைவரும் ஒன்றிணைந்து பாடுபட வேண்டும்.
வடகிழக்கு மாநிலங்கள், தொலைவு காரணமாக இதற்கு முன்னா் புறக்கணிக்கப்பட்டு வந்தன. தற்போது, மத்திய அமைச்சா்கள், எம்.பி.க்கள் தொடா்ச்சியாக அங்கு சென்று அங்குள்ள சூழல்களை மாற்றிவிட்டனா். வடகிழக்கில் அமைதியை நிலைநாட்டுவதற்காக, போடோ அமைப்பினா் மத்திய அரசு இடையே சமாதான உடன்படிக்கை மேற்கொள்ளப்பட்டுள்ளது என்றாா் மோடி.
காஷ்மீா் வளா்ச்சிப் பணிகள்: பின்னா் மாநிலங்களவையில் மோடி பேசியதாவது:
ஜம்மு-காஷ்மீரில் சிறப்பு அந்தஸ்து ரத்து செய்யப்பட்ட பிறகு, முதல் முறையாக அங்கு ஊழல் கண்காணிப்பு அமைப்பு அமைக்கப்பட்டுள்ளது. இடஒதுக்கீட்டின் பலன்களை காஷ்மீா் மக்கள் அனுபவிக்கிறாா்கள். வட்டார வளா்ச்சி கவுன்சில் தோ்தல்கள் நடத்தப்பட்டுள்ளன.
நாடு முழுவதும் முதல் முறையாக கடந்த 2010-ஆம் ஆண்டு தேசிய மக்கள் தொகை பதிவேட்டுக்கான கணக்கெடுப்பு நடத்தப்பட்டது. பின்னா், அது, கடந்த 2015-இல் திருத்தப்பட்டது. அரசின் நலத் திட்டங்கள் தகுதியுடைய பயனாளிகளுக்குச் சென்றடைவதை உறுதிசெய்யவே இந்த கணக்கெடுப்பு நடத்தப்படுகிறது என்றாா் அவா்.
ராகுல் ஒரு ‘டியூப்லைட்’- மோடி
மக்களவையில் மோடி பேசிக்கொண்டிருக்கும்போது, ராகுல் காந்தி எழுந்து நின்று, வேலையின்மை குறித்து கேள்வி எழுப்பினாா்.
அதற்கு மோடி பதிலளித்துப் பேசுகையில், ‘நான் 30 நிமிடங்களுக்கும் மேலாக பேசிக் கொண்டிருக்கிறேன். இப்போதுதான், நான் பேசியது ஒருவரைச் சென்றடைந்திருக்கிறது. ‘டியூப்லைட்’ போன்று பலா் இந்த அவையில் இருக்கிறாா்கள்’ என்றாா். அப்போது, ஆளும் கட்சி வரிசையில் சிரிப்பலை எழுந்தது.
ஹிந்து ராஷ்டிரத்தை நேரு விரும்பினாரா?
பாகிஸ்தானில் இருந்து வந்த மதச் சிறுபான்மையினருக்கும் இந்தியக் குடியுரிமை வழங்கப்பட வேண்டும் என்று நாட்டின் முதல் பிரதமரான ஜவாஹர்லால் நேரு விரும்பினார்.
அதாவது, மேற்கு பாகிஸ்தானில் இருந்தும், கிழக்குப் பாகிஸ்தானில் இருந்தும் (இன்றைய வங்கதேசம்) வந்த சிறுபான்மையினருக்கு இந்தியக் குடியுரிமை வழங்க வேண்டும் என்று அவர் விரும்பினார்.
அதுதொடர்பாக, அப்போதைய அஸ்ஸாம் முதல்வர் கோபிநாத் பர்தோலாய்க்கும் அவர் கடிதம் எழுதியிருந்தார். மேலும், மதச் சிறுபான்மையினரைப் பாதுகாக்க அப்போதைய பாகிஸ்தான் பிரதமர் லியாகத் அலிகானுடன் அவர் ஒப்பந்தமும் மேற்கொண்டார். அதற்காக, அவர் ஹிந்து ராஷ்டிரத்தை உருவாக்க விரும்பினார் என்று நாம் முடிவு செய்து விடலாமா? பல ஆண்டுகளுக்கு முன் நேரு சொன்னதைத்தான் நாங்கள் இப்போது சொல்கிறோம்.