முனிச் பாதுகாப்பு மாநாட்டில், இந்தோ பசிபிக் பிராந்திய ஒழுங்கு மற்றும் பாதுகாப்பு என்ற தலைப்பில் நடந்த விவாதத்தில் பங்கேற்ற பாரத வெளியுறவுத்துறை அமைச்சர் ஜெய்சங்கர், ‘எல்லைக் கட்டுப்பாட்டுக் கோட்டில் படைகளை குவிக்கக் கூடாது என்ற ஒப்பந்தத்தை சீனா மீறியதே பாரதத்துடனான அதன் உறவு கடினமான கட்டத்தில் செல்வதற்குக் காரணம். சீனாவுடனான கருத்து வேறுபாடுகள் காரணமாக மேற்கத்திய நாடுகளுடனான பாரதத்தின் உறவுகள் மேம்பட்டன என்ற கருத்து முற்றிலும் தவறு. அதற்கு முன்பே மேற்கத்திய நாடுகளுடன் பாரதத்தின் உறவுகள் கண்ணியமாகவும் சீராகவும் இருந்தன. பாரத சீன நிலைமையை உக்ரைன் நெருக்கடியுடன் ஒப்பிட முடியாது. இரண்டும் தனிப்பட்டவை’ என கூறினார். மேலும், சீனாவின் உதவியை ஏற்கும் போது கடன் வலையில் சிக்கிக் கொள்ளாமல் இருக்க நாடுகளை எச்சரித்த ஜெய்சங்கர், ‘சர்வதேச உறவுகள் போட்டித்தன்மை வாய்ந்தவை. ஒவ்வொரு நாடும் வாய்ப்புகளைத் தேடும். அது என்ன செய்ய முடியும் என்பதைப் பார்க்கும். ஆனால் அவ்வாறு செய்யும்போது, அவர்கள் எதைப் பெறுகிறார்கள் என்பதைப் பற்றி கவனமாக இருக்க வேண்டும். எங்கள் பிராந்தியம் உட்பட நாடுகள் பெரும் கடன்களால் சிக்கித் தவிப்பதை நாங்கள் கண்டிருக்கிறோம். விமானம் வராத விமான நிலையங்கள், கப்பல் வராத துறைமுகங்கள், வணிக ரீதியாக நீடிக்க முடியாத திட்டங்களை நாங்கள் பார்த்திருக்கிறோம்’ என தெரிவித்தார்.