என். ரமணி எனும் புல்லாங்குழல் ரமணி, புகழ்பெற்ற கர்நாடக புல்லாங்குழல் இசை மேதை, கர்நாடக இசையுலகில் நீண்ட புல்லாங்குழலை அறிமுகப்படுத்திய பெருமை இவருக்கு உண்டு. கர்நாடக இசையின் மும்மூர்த்திகளுடன் தொடர்புடைய திருவாரூரில் 1934ம் ஆண்டு, அக்டோபர் மாதம் 15ம் தேதி பிறந்தார். தனது தாத்தாவான புகழ்பெற்ற புல்லாங்குழல் கலைஞர் மற்றும் பாடகர் ஸ்ரீ ஆழியூர் நாராயணசுவாமி ஐயரிடம் இசையைக் கற்றுக்கொண்டார். புல்லாங்குழலில் இருந்த ரமணியின் ஆர்வத்தை அறிந்ததால், ரமணியின் கர்நாடக இசை அறிமுகம் ஐந்து வயதிலேயே தொடங்கியது.
தனது 8 வயதில் முதல் கச்சேரியை நிகழ்த்தினார். தமிழ்நாட்டின் நாகப்பட்டினத்திற்கு அருகிலுள்ள சிக்கல் சிங்காரவேலவர் கோயிலில் முதல் கச்சேரி நடைபெற்றது. அவரை வெளிச்சத்திற்குக் கொண்டு வருவதில் அவரது தாயார் சாரதாம்பாள் முக்கியப் பங்காற்றினார். ரமணி முதன்முறையாக தனது குரு டி.ஆர். மகாலிங்கத்துடன் ஒரு கச்சேரியில் இணைந்து வாசித்தார். 1945ல், அகில இந்திய வானொலியில் தனது முதல் கச்சேரியை நிகழ்த்தினார். 22 வயதில், ரமணி தனது வாழ்க்கையில் உச்சத்தை அடைந்து சர்வதேச புகழ் பெற்ற கலைஞரானார். நாடு முழுவதும் உள்ள அனைத்து முக்கிய மாநிலங்கள், சபைகள் மற்றும் அரங்குகளில் நிகழ்ச்சிகளை நடத்தினார். அத்துடன் அமெரிக்கா, கனடா, பிரான்ஸ், ஜெர்மனி, சுவிட்சர்லாந்து, இலங்கை மற்றும் பிற நாடுகள் உட்பட உலகம் முழுவதும் பல இடங்களிலும் நிகழ்ச்சிகளை நடத்தினார்.
19 ஆம் நூற்றாண்டின் பிற்பகுதி வரை, 6- துளை புல்லாங்குழலுக்கு இணையான தென்னிந்தியக் கருவியான, 8- துளை மூங்கில் புல்லாங்குழலான கர்நாடகப் புல்லாங்குழல், கர்நாடக இசை நிகழ்ச்சிகளில் ஒரு முக்கிய வாத்தியக் கருவியாகப் பயன்படுத்தப்பட்டதில்லை. கர்நாடக இசை நிகழ்ச்சிகளில் கர்நாடகப் புல்லாங்குழலை, செல்வாக்குமிக்க வாத்தியக் கருவியாக அறிமுகப்படுத்தினார். இந்த பாணியை சுயமாகக் கற்றுக்கொண்ட “மாலி”தான் கர்நாடக புல்லாங்குழலை பிரபலப்படுத்துவதில், ஒரு புரட்சியைக் கொண்டு வந்தார். சென்னையில் உள்ள மியூசிக் அகாடமியால் வழங்கப்படும் சங்கீத கலாநிதி விருது, சங்கீத நாடக அகாடமி, சென்னை இந்திய நுண்கலைச் சங்கத்தால் 2007ஆம் ஆண்டிற்கு வழங்கப்படும் சங்கீத கலாசிகாமணி விருது, அமெரிக்காவின் வாசர் கல்லூரியால் வழங்கப்படும் சங்கீத ஆச்சார்யா விருது, அமெரிக்காவின் ஓஹியோவில் உள்ள மேரிலாந்தின் கௌரவக் குடியுரிமை அந்தஸ்து மற்றும் இந்தியக் குடியரசுத் தலைவரால் வழங்கப்படும் பத்மஸ்ரீ விருது போன்ற விருதுகளைப் பெற்றுள்ளார். அரிசோனா உலகப் பல்கலைக்கழகத்திடமிருந்து கௌரவப் டாக்டர் பட்டத்தையும் பெற்றுள்ளார்.
புல்லாங்குழல் இசை உலகில் தனக்கென ஒரு சகாப்தத்தை உருவாக்கிய டாக்டர் என். ரமணி 2015ம் ஆண்டு அக்டோபர் மாதம் 9 அன்று புற்றுநோய் பாதிப்பால், தனது 80-வது வயதில் சென்னை மயிலாப்பூரில் காலமானார். இவருடைய மகன் ஆர். தியாகராஜன் மற்றும் பேரன் அதுல் கமார் ஆகியோரும் புல்லாங்குழல் கலைஞர்களாக இவருடைய இசைப் பாரம்பரியத்தைத் தொடர்ந்து வருகின்றனர்.