மத்திய அமைச்சர் கிஷன் ரெட்டி, கேரளாவின் கோட்டயத்தில் உள்ள காந்தி ஸ்மிருதி பவனில், திருவிதாங்கூர் சிங்கம் என்று அழைக்கப்படும் வைக்கம் பத்மநாப பிள்ளையின் சிலையை திறந்து வைத்தார். அப்போது பேசிய அவர், “வைக்கம் பத்மநாப பிள்ளை ஒரு துணிச்சலான போராளி. தேச விரோதிகளுக்கு எதிராக போராட கேரளாவின் பாரம்பரிய தற்காப்புக் கலையான களரிபயட்டைப் பயன்படுத்தினார். திப்பு சுல்தானை தோற்கடிப்பதிலும் அவர் முக்கிய பங்கு வகித்தார். நமது தேசத்தின் சுதந்திரப் போராட்டத்தில் பாடுபட்ட மக்களால் அதிகம் அறியப்படாத மாவீரர்களின் வாழ்க்கையைக் கொண்டாடி வெளிப்படுத்த வேண்டியது அவசியம். ‘ஆசாதி கா அம்ரித் மஹோத்சவ்’ மூலம் மத்திய அரசு அதை நினைவுகூருகிறது” என்றார்.
இந்நிகழ்ச்சியில் பேசிய பிரஜ்னா பிரவா அமைப்பின் தேசிய ஒருங்கிணைப்பாளர் ஸ்ரீ ஜெ. நந்தகுமார், “மைசூரின் கொடுங்கோலன் திப்பு சுல்தானை வைக்கம் பத்மநாப பிள்ளை போராடி தோற்கடிக்கவில்லை என்றால், திருவிதாங்கூரின் வரலாறு சீரழிந்திருக்கும். அவர் மட்டும் இல்லாதிருந்தால், திருவிதாங்கூர் மற்றொரு மலபாராக, மற்றொரு ஹிந்து இனப்படுகொலைக்கான களமாக மாறியிருக்கும். 1808ல், பிரிட்டிஷ் ரெசிடென்ட் கர்னல் மெக்காலேவுக்கு எதிரான தாக்குதலுக்குத் தலைமை தாங்கியவர் பத்மநாப பிள்ளை. ஆனால், அவர் திப்புவைத் தோற்கடித்ததால் மட்டுமே வரலாறு அவருக்கு உரிய தகுதியைக் கொடுக்கவில்லை. இடதுசாரி வரலாற்றாசிரியர்கள் திப்புவை வென்றவர் ஒரு சிறந்த சுதந்திரப் போராட்ட வீரராகக் கொண்டாடப்படுவதை விரும்பவில்லை” என்று கூறினார்.
வைக்கம் பத்மநாப பிள்ளை முன்னாள் திருவிதாங்கூர் ராஜ்ஜியத்தின் ராணுவத் தளபதியாக இருந்தார். 1789 டிசம்பரில் நெடுங்கோட்டை கோட்டைகளில் மைசூர் ராணுவத்தை பதுங்கியிருந்து தாக்கினார். வரலாற்றின் படி, நெடுங்கோட்டை போர் திருவிதாங்கூர் சமஸ்தான வரலாற்றில் மிகவும் துணிச்சலான தாக்குதல்களில் ஒன்றாகும். இதில் ஒரு சில போராளிகள் நன்கு ஆயுதம் ஏந்திய எதிரி ராணுவத்திற்குள் ஊடுருவி தாக்கினர், வெற்றிகரமாக அவர்களை பின்வாங்கச் செய்தனர். இந்த தாக்குதலில், திப்பு சுல்தான் பலத்த காயம் அடைந்து நிரந்தர முடமானார். அவர்களின் தோல்விக்குப் பிறகு, மைசூர் ராணுவம் 1790ல் மீண்டும் கோட்டையைத் தாக்கியது. இரண்டாம் நெடும்கோட்டா போரின்போது, பத்மநாப பிள்ளையும் சக சிப்பாய் குஞ்சி குட்டிப் பிள்ளையும் திப்புவின் ராணுவத்தை பூதத்தான்கெட்டு என்ற இடத்தில் உள்ள அணையின் சுவர்களை உடைத்து பெரியாற்றின் கீழே பெரும் வெள்ளத்தை உண்டாக்கினர். இந்த நடவடிக்கையின் விளைவாக, திப்புவின் காலாட்படையின் பெரும்பகுதி நீரில் அடித்துச்செல்லப்பட்டது. வெடிமருந்துகள் மற்றும் துப்பாக்கி குண்டுகள் அனைத்தும் ஈரமாகி, திப்பு பின்வாங்க வேண்டிய கட்டாயம் ஏற்பட்டது. மெக்காலேயைக் கொல்லும் முயற்சி கைவிடப்பட்ட பிறகு, பத்மநாப பிள்ளை, ஆலப்புழா அருகே உள்ள பள்ளத்துருத்தியில் பிரிட்டிஷ் சிப்பாய்களின் குழுவைத் தாக்கினார், அதில் 13 பிரிட்டிஷ் வீரர்கள் படுகொலை செய்யப்பட்டனர். கர்னல் மெக்காலேயைக் கொல்லும் முயற்சி மற்றும் பிரிட்டிஷ் சிப்பாய்களைக் கொன்ற அவரது செயலுக்காக 1809 ல் அவர் கைது செய்யப்பட்டு பகிரங்கமாக தூக்கிலிடப்பட்டார்.