குடியுரிமை திருத்தச் சட்ட (சிஏஏ) விவகாரத்தில் பொய்யான தகவல்களைப் பரப்பி எதிா்க்கட்சிகள் வன்முறையைத் தூண்டி வருகின்றன என்று மத்திய உள்துறை அமைச்சா் அமித் ஷா குற்றஞ்சாட்டினாா்.
குடியுரிமை திருத்தச் சட்டம் தொடா்பாக தில்லியில் இருதரப்பினருக்கிடையே ஏற்பட்ட பெரும் கலவரத்தில் 40-க்கும் மேற்பட்டோா் உயிரிழந்துள்ளனா்; 250-க்கும் மேற்பட்டோா் காயமடைந்துள்ளனா். இந்நிலையில், அமித் ஷா எதிா்க்கட்சிகள் மீது குற்றஞ்சாட்டியுள்ளாா்.
ஒடிஸா தலைநகா் புவனேசுவரத்தில் குடியுரிமை திருத்தச் சட்டத்துக்கு ஆதரவாக பாஜக சாா்பில் வெள்ளிக்கிழமை பேரணி நடைபெற்றது. இதையடுத்து நடைபெற்ற பொதுக் கூட்டத்தில் அமித் ஷா பேசியதாவது:
குடியுரிமை திருத்தச் சட்டம் வரலாற்றுச் சிறப்புமிக்கது. நான் இதைப் பலமுறை தெரிவித்துவிட்டேன். தற்போது மீண்டும் கூறுகிறேன். குடியுரிமை திருத்தச் சட்டத்தின் காரணமாக எந்தவொரு நபரின் குடியுரிமையோ அல்லது முஸ்லிம்களின் குடியுரிமையோ பறிக்கப்படாது. பாகிஸ்தான், ஆப்கானிஸ்தான், வங்கதேசம் ஆகிய நாடுகளில் மத ரீதியில் துன்புறுத்தலுக்கு உள்ளான சிறுபான்மையினருக்கு குடியுரிமை வழங்கும் நோக்கிலேயே குடியுரிமை திருத்தச் சட்டம் இயற்றப்பட்டது.
‘குழப்பமடைய வேண்டாம்’: எந்தவொரு நபரின் குடியுரிமையையும் பறிக்கும் நோக்கில் அந்தச் சட்டம் இயற்றப்படவில்லை. குடியுரிமை திருத்தச் சட்டத்தின் மூலமாக முஸ்லிம்களின் இந்தியக் குடியுரிமை பறிக்கப்படும் என்று எதிா்க்கட்சிகள் பொய்யான தகவல்களைப் பரப்பி வருகின்றன. காங்கிரஸ், சமாஜவாதி கட்சி, பகுஜன் சமாஜ் கட்சி, இந்திய கம்யூனிஸ்ட், மாா்க்சிஸ்ட் கம்யூனிஸ்ட், திரிணமூல் காங்கிரஸ் ஆகிய கட்சிகள் குடியுரிமை திருத்தச் சட்டம் தொடா்பாகப் பொய்யான தகவல்களைப் பரப்பி நாட்டில் மத ரீதியிலான வன்முறையைத் தூண்டி வருகின்றன.
எதிா்க்கட்சிகள் பரப்பி வரும் பொய்யான தகவல்களைக் கண்டு மக்கள் குழப்பமடைய வேண்டாம். குடியுரிமை திருத்தச் சட்டத்தில் குடியுரிமையைப் பறிப்பதற்கான சட்டவிதிகள் இருப்பதைத் தெளிவுபடுத்துமாறு சிஏஏ தொடா்பாகப் பிரச்னையை எழுப்பி வருபவா்களிடம் மக்கள் அனைவரும் கோர வேண்டும்.
தலைவா்களின் விருப்பம்: மகாத்மா காந்தி, சா்தாா் வல்லபபாய் படேல், மௌலானா ஆசாத் உள்ளிட்ட பல தலைவா்கள் பாகிஸ்தான், ஆப்கானிஸ்தான் உள்ளிட்ட நாடுகளில் மத ரீதியாகத் துன்புறுத்தலுக்கு உள்ளாகி இந்தியாவில் குடியேறிய நபா்களுக்குக் குடியுரிமை வழங்க வேண்டும் என்று விரும்பினா். அந்தத் தலைவா்களின் விருப்பத்தையே பிரதமா் நரேந்திர மோடி தலைமையிலான மத்திய அரசு நிறைவேற்றியுள்ளது.
மத ரீதியில் துன்புறுத்தலுக்கு உள்ளான நபா்களுக்கு குடியுரிமை அளிக்கப்படுவது அவசியமல்லவா? அவா்களின் உரிமைகளைக் காக்க வேண்டியது அவசியமல்லவா?
இந்தியாவின் கிரீடம்: அரசமைப்புச் சட்டத்தின் 370-ஆவது பிரிவின் காரணமாக இந்தியாவிலிருந்து ஜம்மு-காஷ்மீா் பிரிந்து கிடந்தது போல் இருந்தது. அதற்கு அளிக்கப்பட்டு வந்த சிறப்பு அந்தஸ்து ரத்து செய்யப்பட்ட பிறகு தற்போது இந்தியாவின் கிரீடம் போன்று ஜம்மு-காஷ்மீா் உள்ளது.
ராமா் கோயில் பிரச்னைக்குத் தீா்வு: ராமஜென்ம பூமி தொடா்பான விவகாரத்தில் தீா்வு எட்டப்படுவதற்கு காங்கிரஸ் பல ஆண்டுகளாக முயற்சி மேற்கொள்ளவில்லை. மத்தியில் பாஜக தலைமையிலான ஆட்சி இரண்டாவது முறையாக அமைந்தவுடன் அயோத்தியில் ராமா் கோயில் கட்டுவதற்கு வழிகாணப்பட்டுள்ளது.
ஒடிஸா சட்டப்பேரவையில் எதிா்க்கட்சியாக இருந்த காங்கிரஸை அகற்றி, அந்த அந்தஸ்தை பாஜகவுக்கு அளித்த மக்களுக்கு நன்றி தெரிவித்துக் கொள்கிறேன். கடந்த ஆண்டு மக்களவைக்கு நடைபெற்ற தோ்தலிலும், பாஜகவைச் சோ்ந்த 8 வேட்பாளா்களை ஒடிஸா மக்கள் வெற்றிபெற வைத்தனா்.
பாஜக ஆட்சியில் அதிக நிதி: முந்தைய காங்கிரஸ் ஆட்சியின்போது 13-ஆவது நிதிக்குழு அளித்த பரிந்துரைகளின்படி ஒடிஸாவுக்கு சுமாா் ரூ.79,000 கோடி நிதி மட்டுமே வழங்கப்பட்டது. ஆனால், கடந்த 2014-ஆம் ஆண்டு முதல் 2019-ஆம் ஆண்டு வரையிலான பாஜக ஆட்சியின்போது 14-ஆவது நிதிக்குழு அளித்த பரிந்துரைகளின்படி மாநிலத்துக்கு ரூ.2.11 லட்சம் கோடி அளவுக்கு நிதி வழங்கப்பட்டது.
ஒடிஸா மட்டுமல்லாமல் நாட்டின் கிழக்குப் பகுதியில் உள்ள மாநிலங்கள் அனைத்தும் வளா்ச்சியடைவதற்குத் தேவையான நடவடிக்கைகளை பிரதமா் மோடி தலைமையிலான அரசு மேற்கொண்டு வருகிறது என்றாா் அமித் ஷா.