நானும் என் தந்தையும் சர்க்கஸ் பார்க்கச் சென்றோம். டிக்கட் வாங்குவதற்காக வரிசையில் நின்றோம். எங்களுக்கும் டிக்கட் கவுண்ட்டருக்கும் இடையில் ஒரு குடும்பம். குடும்பத் தலைவருடன் அவருடைய மனைவி, எட்டு குழந்தைகள். அவர்கள் அங்கிருந்த மிருகங்களையும், ஜோக்கர்களின் புகைப்படத்தையும் பார்த்து ஆர்வத்துடன் பேசிக் கொண்டிருந்தனர். இன்னும் சிறிது நேரத்தில் அவற்றை நேரிடையாக காணப்போவதை பற்றி பேசி மகிழ்ந்தனர். அவர்கள் பேச்சிலிருந்து, அவர்கள் இதுவரை சர்க்கஸுக்கு வந்ததில்லை என்பது புரிந்தது. அவர்களுடைய வாழ்க்கையின் பெரிய சந்தோஷம் இது.
அவரும் அவரின் மனைவியும் குழந்தைகளின் சந்தோஷத்தைக் கண்டு மகிழ்ந்து கொண்டிருந்தனர். டிக்கெட் கவுண்டரில் இருந்த பெண் அவரிடம் எத்தனை டிக்கட் என்று கேட்டாள். அவரும் கூறினார். கவுண்டரில் இருந்த பெண் அதற்கான பணத்தை கணக்கிட்டுக் கூறினாள். உடனே, அவர் மனைவியிடம் நீ குழந்தைகளை அழைத்துக் கொண்டு முன்னே செல் என்று கூறி விட்டு, மீண்டும் அந்தக் பெண்ணிடம் எவ்வளவு தொகை என்று கேட்டார். அவரிடம் போதுமான பணம் இருக்கவில்லை. அவருக்கு இந்த சூழலை எப்படி சமாளிப்பது, சந்தோஷத்தில் இருக்கும் குழந்தைகளிடம் எப்படி இதனை கூறுவது என்று புரியாமல் தவித்தார்.
இதனை பார்த்துக் கொண்டிருந்த என் தந்தை, தனது பாக்கெட்டிலிருந்து நூறு ரூபாய் தாளை எடுத்துத் தரையில் போட்டார். நாங்கள் ஒன்றும் சொல்லிக்கொள்ளும்படி பெரிய செல்வந்தர்கள் இல்லை. என் தந்தையே குனிந்து அந்தப் பணத்தை எடுத்து, அவரிடம் கொடுத்து “சார், இந்த பணம் உங்கள் பாக்கெட்டிலிருந்து விழுந்தது” என்றார்.
அவருக்கு நன்றாக புரிந்தது என் தந்தையின் உதவும் மனநிலை. அவர் எங்களிடம் யாசகம் கேட்கவில்லை, எனினும் கையறுந்த நிலையில் அவரால் அதை மறுக்கவும் முடியவில்லை. அவர் எனது தந்தையின் இரணடு கைகளையும் பற்றிக்கொண்டு கண்களில் ஒரு சொட்டு கண்ணீருடன், “மிக்க நன்றி சார், இந்த பணம் எனக்கு இப்பொழுது மிகவும் மதிப்பில்லாதது” என்றார்.
நானும் என் தந்தையும் வீட்டிற்குத் திரும்பினோம். என் தந்தை கொடுத்தது நாங்கள் சர்க்கஸுக்குப் போக வைத்திருந்த பணம். அதனால் நாங்கள் சர்க்கஸுக்கு செல்லவில்லை என்றாலும், அடைந்த சந்தோஷத்திற்கும் மனநிறைவுக்கும் அளவில்லை. அன்று கற்றுக் கொண்டேன் “பிறருக்கு உதவுவதில்” உள்ள சந்தோஷத்தின் மதிப்பை. அன்பு எனப்படுவது.. பிறரிடம் இருந்து பெறுவதில் இல்லை, பிறருக்குக் கொடுப்பதிலேயே உள்ளது.
(சமூக வலைத்தளத்தில் இருந்து)